Шымкенттік полицейлер халықаралық іздеуде болған күдіктіні ұстады. Аса ірі мөлшерде жасалған алаяқтық үшін күдікті болған әйел жедел-іздестіру іс-шараларының нәтижесінде қолға түскен.
Әйел шетелге арзан бағамен туристік сапарлар ұйымдастырамын деп ақша алып, турларды ұйымдастырмай, қаражатты қайтармаған. Сондай-ақ ол кәсіпкердің сеніміне кіріп, алтын бұйымдарын иемденген. Күдікті жалпы 80 миллион теңгеден асатын материалдық шығын келтірген.
— Аталған жайттар бойынша күдіктіге халықаралық іздеуге жарияланған. Кешенді жедел-іздестіру шараларының нәтижесінде әйел ұсталып, уақытша ұстау изоляторына қамалды. Қазіргі таңда істің барлық мән-жайын анықтауға және қылмыстық әрекеттердің қосымша эпизодтарын әшкерелеуге бағытталған тергеу жұмыстары жүргізіліп жатыр, — делінген Шымкент қаласы Полиция департаменті таратқан ақпаратта.