Елімізде жарияланған төтенше жағдайға байланысты шымкенттік бірқатар кәсіпкерлер сақтық үшін жұмысын тоқтатты. Айталық Еңбекші ауданында 116 нысан жұмысын уақытша тоқтатты Атап айтқанда, 28 мейрамхана, 3 сауда – ойын-сауық орталығы, 36 монша кешені, 13 бильярд, 18 интернет клубы және 18 букмекерлік кеңсе жабылды. Бұл туралы Еңбекші ауданының әкімі Ғалымжан Ілиясов ақпараттық-коммуникация орталығында өткен брифингте мәлімдеді.
— Аудан аумағындағы "Евразия", "Бенефис", "Әсел", "Алтын орда" базарларының жұмысы тоқтатылды. Ал "Исатай", "Көктем" базарлары мен "Айна" базарының азық-түлік сататын бөлігі 10:00-ден 18:00-ге дейін шектеулі режимде жұмыс істеуде. Ал "Айна" базарындағы "Көктем" автобекеті жұмысын биылғы 25 наурыздан бастап тоқтатты, - деді аудан әкімі.
Ғ.Ілиясовтың айтуынша, «Фосфоршылар» сарайы мен «Әсел» базарының алдында апта сайын өтетін азық-түлік жәрмеңкелері де жұмысын тоқтатқан. Сонымен бірге, аудандағы телефон сататын 7 дүкен уақытша жабылған. Осы орайда Шымкент қаласының төтенше жағдай жөніндегі штаб өкілдері қала тұрғындарына сақтық шаралын сақтап, көшеге себепсіз шықпауға, шыққан жағдайда бетперде киіп жүруге және қолды жиі жууға кеңес берді.