Шымкент инвестициялық жобалар талқылайтын қалаға айналып келеді. Былтырғы жылдың қорытындысы бойынша шуақты шаһарға 194,5 миллиард теңге инвестиция тартылыпты. Нәтижесінде, қала аумағында шетелдік инвесторлардың қатысуымен 2,5 млрд АҚШ долларын құрайтын 15 инвестициялық жоба жүзеге асырылды.
Бұл бірінші кезекте өңірдегі бұрыннан келе жатқан алпауыт кәсіпорындарды ұйқысынан оятып, әділ бәсекеге ынталандырды. Озған елдердің озық технологиясын енгізіп, экономиканы еселей түсуге жігерлендірді.
Инвестиция бірінші кезекте бизнеске қолайлы ортаны таңдайды. Кәсіпкерлікке ыңғайлы орта іздегендер әуелі бейбітшілік пен келісім ұялаған елдердің есігін қағатыны тағы бар. Себебі қоғамы тұрақты елдің экономикасында өсім көп болмақ.
Былтыр «Kazakh Invest» қолдауымен елімізге жалпы көлемі 55 миллиард долларға жуық 228 инвестициялық жоба тартылған. Шетелдік алпауыттар агроөнеркәсіп, машинажасау, тау-кен металлургиясы, мұнай-газ химиясы, көлік-логистика, жаңғырмалы энергетика және құрылыс индустриясы салаларына қаржы құя бастаған. Топ-инвестор елдердің қатарында елімізге Еуропалық одақ мемлекеттері, АҚШ, Ресей, Түркия, Сингапур мен Қытай көптеп инвестиция салуда.
Ал шетелдіктер қызығушылық танытқан салалардың ішінде соңғы кездері агроөнеркәсіп, мұнай-газ химиясы, құрылыс индустриясы үшінші мегаполисте жанданып келеді.