Шымкент қаласындағы су айдындарында шомылу маусымы кезеңінде азаматтардың қауіпсіздігін қамтамасыз ету бағытында жергілікті атқарушы органдар, полиция департаменті және Ұлттық ұланмен бірлескен жұмыс жүргізілуде. Бұл туралы Ақпараттық коммуникация орталығында өткен баспасөз брифингінде Шымкент қаласының Төтенше жағдай департаменті басшысының орынбасары Ерғали Бахаев мәлімдеді.
Қазіргі таңда қаладағы 5 демалыс орны арнайы қаулы жобасына енгізілген.
- Қала аумағында Бадам және Сайрам су өзендері бар, шомылу маусымы кезінде олардың тереңдігі 50 сантиметрден саяз, сондықтан бұл акваторияларда шомылуға болмайды, - деді спикер.
Төтенше жағдай енгізілген кезде адамдардың жаппай демалатын орындарының қызметі тоқтатылғанына қарамастан, су айдындарында жазатайым оқиғалардың алдын алу бойынша белсенді үгіт-насихат жұмыстары жүргізілуде. 2020 жылға әлеуметтік аз қамтылған отбасылардың балаларын демалыс орындарында шомылуға үйрету бойынша меморандумдар жасау үшін аудан әкімдіктерімен жұмыстар жүргізілуде.
Бүгінгі таңда Шымкент қаласының су айдындарында жазатайым оқиғалар тіркелген жоқ.