Биыл үшінші мегаполисте жол жөндеу жұмыстары қыза түсуде. Шымкент қаласындағыи Рысқұлов пен Түркістан көшесі аралығындағы Байтұрсынов көшесінде 6 маусымнан бастап, 13 маусымға дейін орташа жөндеу жұмыстары жүргізіліп жатыр. Бұл туралы Шымкент қаласы әкімінің орынбасары Мақсұт Исахов хабарлады.
– Өздеріңізге мәлім, қаладағы бірнеше басты жолдарда жөндеу жұмыстары жүріп жатыр. Көптеген тұрғындардан сауалдар мен пікірлер байқап жатырмыз. Бүгін өзім де арнайы мердігерлердің жұмысын қадағалап, халықтың қолайлылығы мен қауіпсіздігін бақылап қайттым.
Түсінеміз, тұрғындар үшін кішкене автобустардың аялдамаларда тоқтауы, кептелістер қолайсыздық тудырып жатыр. Дегенмен, бір-екі күндік бұл кедергілер кейін жылдар бойы сапалы, қолайлы, төзімді, әрі әдемі жолдарға жеткізеді.
Көпшілігі, жыл сайын жөндей береді деп ойлайды. Бұл олай емес. Бір жылы арықтар салынуы мүмкін, бір жылы газ құбырлары мен конализация жүйесі жүруі мүмкін, былтыр жаяу жүргіншілер мен вело жолдар салынды. Биыл, басқа көшеде жолдар салынып жатыр. Мұның барлығы тұрғындар үшін, қаламыз үшін екенін айтқым келеді», - дейді Шымкент қаласы әкімінің орынбасары Мақсұт Исахов.
Жалпы, бүгінгі таңда қаламызда 175 көше жөнделіп жатса, биылғы жылы жоспар бойынша 256 көшеге орташа және күрделі жөндеу жұмыстарын жүргізу жоспарланып отыр.