«Той десе, қу бас домалайды» демекші, 2020 жылы шаңырақ көтеріп жатқандар көп болғанымен, дүркіретіп тойлау жағы шектеліп тұр.Шымкент қаласының Кәсіпкерлер палатасында Шымкент қаласы әкімінің бірінші орынбасары Ербол Садыр, қалалық тауарлар мен қызметтердің сапасы мен қауіпсіздігін бақылау департаментінің басшысы Ә.Төлебаевтың қатысуымен өткен жиында тойхана, мейрамханалардың мәселесі талқыланды.
– Бүгінде қалада эпидемиологиялық жағдай күрделі. Сондықтан карантиндік режим аяқталғанша тойханалардың қызметін бастауға рұқсат берілмейді. Егер 22 маусымнан кейін санитарлық-эпидемиологиялық жағдай тұрақталса, тойханаларды ашуға байланысты жеңілдіктерді қарастырамыз, -деді қала әкімінің орынбасары Ербол Әбілхайырұлы.
Айта кету керек, Шымкентте сыйымдылығы 250 адамнан асатын 100-ге жуық тойхана бар. Төтенше жағдай енгізілгенге дейін әр тойханада айына орта есеппен 15 тойдан өткізіліп келген. Жалпы бұл салада 6 мыңнан астам адам жұмыс істесе, 500-ден астам кішігірім бизнес ұйымдары осы салада қызмет көрсетеді.
Пандемия өршіп тұрғанымен шымкенттік ағайын арқаны кеңге салып жүрген сыңайлы. Қалада түсіндірме жұмыстары мен шектеу шараларын тексеру қызып тұр. Мобильдік топтар да белсене қызмет атқарып, бағаны бақылауда ұстап тұр. Әсіресе, тойхана мен той мәселесі биліктің назарын өзіне аудартып отыр.
Бүгінде тойхана есебінен жан баққан азаматтардың 90 пайызы жұмыссыз қалып отыр.