Мемлекет басшысы Қасым-Жомарт Тоқаевтың кезекті «Әділетті мемлекет. Біртұтас ұлт. Берекелі қоғам» атты Жолдауында ауыл шаруашылығы саласына басымдық бере отырып, егіс алқаптары мен ағынсу мәселесіне ерекше мән берген болатын.
«Ауыл шаруашылығын дамыту – негізгі проблеманың бірі. Осы саладағы ахуал мемлекетіміздің азық-түлік қауіпсіздігіне тікелей әсер етеді. Еліміздің ауыл шаруашылығы өнімдерінің көлемін және оның қосымша құнын арттыру қажет. Бұл – стратегиялық міндет. Қазір тек бидай мен мал сатып отыратын заман емес. Үкімет агроөнеркәсіп саласын субсидиялаудың ұзақ мерзімге арналған жаңа тәсілдерін әзірлеуге тиіс. Бюджет қаражатының қайтарымы болуы керек. Мемлекет қаржыны оңды-солды шашып, ысырап етуге жол бермейді.Субсидия бөлуге және оның жұмсалуына жүргізілетін бақылауды күшейту керек», деген еді Президент.
«Бұл жерде менің алып-қосарым агроөнеркәсіп саласын субсидиалауда алдымен өнім өндіруші фермерлерге нақтылай және тікелей берілуі тиіс деп ойлаймын» дейді Сауран ауданы ауыл шаруашылығы бөлімінің басшысы Сәкен Оразбаевқа. Сонымен қатар, ол өнімді ұқсата пайдаланушыларға және қалдықсыз технологиямен жұмыс істеушілерге, диқандарға маусымдық далалық жұмыстарды атқаруына дизель отынын жеңілдікпен, едәуір төмен беруі керек дейді.
«Шаруалардың өзара ұжымдасуы ауыл шаруашылығын дамытуға жол ашып отыр. Біз осындай пилоттық жобаны жүзеге асырдық. Оған қатысқан ауыл шаруашылығы кооперативтерінің егіні екі есе артық өнім берген. Ал, мал басы шамамен 25 пайызға көбейген. Әр өңірдің ерекшелігін ескере отырып, оң тәжірибені бүкіл елге біртіндеп тарату қажет. Бұл салада озық технологиялар тапшы», - дейді Мемлекет басшысы. Бұл шын мәнінде қолдауға тұрарлық жайт. Себебі, бір-бірімен тәжірибе алмаспайтын, өзара томаға тұйық жұмыс жасайтын диқандар мен фермерлердің күйі төмен. Себебі техникасы тозған. Жері құнарсыз. Міне, сондықтан ондаған ауыл шаруашылығы кәсіпорындары өзара ұжымдасуы – үлкен жетістіктерге жеткізуде. Мәселен, Ибатадағы 52 кәсіпорынның бірігуі олардың үлкен инвестицияға қол жеткізуіне мүмкіндік әпереді.
«Қазір ауыл шаруашылығына арналған жер туралы толыққанды ақпарат жоқ. Жердің құнары, су ресурсы мен суару жүйесі және оның жолдары жайлы мәліметтер жан-жақта шашырап жатыр. Цифрлық платформа осының бәрін бір жерге жинақтайды. Тұтастай алғанда, еліміздің агроөнеркәсіп кешені келесі жылдан бастап жаңа әрі тұрақты ереже бойынша жұмыс істеуі қажет. Игерілмей жатқан жерді қайтарып алу жөніндегі комиссияның қызметіне жеке тоқталғым келеді. Комиссия жұмысының аясында ауыл шаруашылығы мақсатындағы 2,9 миллион гектар жер мемлекетке қайтарылды» деді Президент.
- Бұл да техникасы бар, жер жоқ, малы бар жайылымы жоқ шаруаларға үлкен қолдау, үлкен демеу болғалы тұр. Жер де, жайылым да қолынан іс келетін шаруа қожалықтарына берілу керек. Сонда ғана жер ана ырзығын береді. Жерді баптай білетін диқан ғана оның бағасын біліп жұмыс істейді. Президентіміздің де Жолдауда айтып отырғаны осы, - дейді Сауран ауданы ауыл шаруашылығы бөлімінің басшысы Сәкен Оразбаевқа.
