Бүгін, 8 сәуірде Түркістан облысы Полиция департаментінің жанынан ашылған азаматтарды қабылдау кеңсесінде облыс полицейлері тұрғындарға көмек көрсетіп, арыз-шағымдары мен сауалдарына жауап беру үшін АШЫҚ ЕСІК күнін өткізуде. Оған ТО Полиция департаменті Жергілікті полиция қызметі, Әкімшілік полиция, Көші-қон, Кадр және Өзіндік қауіпсіздік, Тергеу басқармаларының қызметкерлері қатысып, таңғы сағат 10:00-ден бастап тұрғындарды қабылдауда. Аталмыш акцияның мақсаты: өңірдегі құқық қорғау органдарындағы мемлекеттік көрсетілетін қызметтің ашықтығын, сыбайлас жемқорлыққа ықпал ететін себептер мен жағдайларды жоюмен қатар, халық алдында оң имидж қалыптастыру.
Азаматтарды карантин талаптарын сақтай отырып өткізіліп жатқан ашық есікке түске дейін 15 адам келді. Олардың барлығы облысымыздың тұрғындары.
Мәселен, іс-шараға қатысқан тұрғындар кадр, көші-қон, жергілікті және әкімшілік полиция қызметкерлерінің көмектерін алды. Нақтырақ айтар болсақ, Шавкат Нышанбаев есімді ер азамат осыдан 6 жыл бұрын несиеге көлік алып, қарызын толық өтегенше көлігі уақытша қамауда (арест) болған. Енді полицейлердің заң аясындағы жұмысы арқылы көлігінің қамаудан алынуы бойынша мәселесін айтып келген. Тұрғынды қабылдаған Жергілікті полиция қызметі басқармасының аға инспекторы, полиция капитаны Құрал Тұрсынов оны мұқият тыңдап, өтінішін қабылдады. Сондай-ақ көлікті базадан тексеріп, оның толыққанды шешілуі үшін тиісті басқармаға ұсынды. Осылайша тұрғынға сол мезетте көмек көрсетілді.
Кадр мәселесі бойынша да Жақсыкүл Бейімбет есімді азаматша келіп, қызының ішкі істер саласына қабылдануы үшін қандай құжаттар керек екендігі туралы толыққанды мәліметтерді алып, ризашылығын айтып кетті.
Бұдан бөлек, жақын шет елдерден жұмысшыларды жалдау, көлік салығы, құжат алу мәселесі бойынша да сұрақтар қабылданып, тұрғындарға жәрдем берілді. Кездесуге келген барлық адамға бірдей полицейлер тарапынан түсіндіру жүргізіліп, маман ретінде кеңестер айтылды.
Ашық есік күнін кешкі сағат 17:00-ге дейін жалғастыратын тәртіп сақшылары ішкі істер саласына қатысты сауалдары мен мәселелері бар барша азаматтарды қабылдауға қатысуға шақырады. Сондықтан бір күнге жоспарланған ашық есік іс-шарасына келіп, берілген мүмкіндікті мүлт жібермеңіздер!
Түркістан облысы ПД-нің баспасөз қызметі
