Шымкентте 23 жылу қазандығы мен 17 сорғы станциясы жылыту маусымына толық дайын. Бұл туралы Өңірлік коммуникациялар қызметі алаңында өткен баспасөз конференциясында Шымкент қаласы әкімінің орынбасары Нұрсадық Ергешбекұлы айтты.
Шымкент қаласының 2023-2024 жылдардағы жылу беру маусымына дайындық жұмыстарының іс-шара жоспары мен штаб құрамы бекітіліп, бүгінгі таңда тұрғын үй-коммуналдық шаруашылық және әлеуметтік сала объектілері мен инфрақұрылым жүйелерінің дайындық жұмыстары толық аяқталды.
Қаланың бөлек орналасқан 23 жылу қазандығы мен орталықтандырылған жылу жүйесіндегі 17 сорғы станциясы жылу беру маусымына толық дайын.
2023 жылы жылу жүйелерінің тозу деңгейін төмендету мақсатында жергілікті және республикалық бюджеттен жалпы 13,2 км. жылу желісін жөндеуге 5,4 млрд. теңге қаржы қаралды.
Атап айтқанда, жалпы ұзындығы 8,8 шақырымды құрайтын жылу жүйесіне ағымдағы жөндеу жұмыстарын жүргізу үшін жергілікті бюджеттен 3,2 млрд. Теңге бөлінген. Бүгінде жөндеу жұмыстары толығымен аяқталды. Сонымен қатар, республикалық бюджеттен 2,2 млрд. теңге бөлініп, 4,5 шақырымды құрайтын жылу жүйелеріне қайта құру жұмыстары толық аяқталды.
Қаладағы 5 ауданда, жылу жүйелерінде ақау орын алған жағдайда, «Қуатжылуорталық-3» МКК-ны тарапынан 36 авариялық бригада жасақталған.
Бұдан бөлек, қала тұрғындары үшін жылу маусымында орын алған ақаулықтарды оперативті түрде жөндеу үшін өтінімдерді қабылдау бойынша диспетчерлік қызмет (телефон номерлері: 44-81-89, 44-82-37) пен бірыңғай «I-Komek-109» орталығы 24/7 форматында жұмыс жасауда.
Сондай-ақ, аудан әкімдіктеріне қарасты коммуналдық мемлекеттік мекемелері құрылып, тұрғындардың коммуналдық мәселеге қатысты арыз-шағымдарын қабылдауға бірыңғай байланыс орталықтары жұмыс атқарады.