Жақында Әл-Фараби ауданының әкімдігінде арнайы брифинг өтті. Жиында мәлім болғандай сот шешіміне байланысты Шымкенттегі «Қырғы базар» маңындағы заңсыз орнатылған дүңгіршектер алынған. «Шаһар басшысы Ғ.Әбдірахымовтың тапсырмасына сәйкес, Төле би көшесінің бойында орналасқан «Қырғы» базар маңын ретке келтіру жұмыстары жалғасады. Бұған дейін Шымқалада орналасқан сегіз базар басшысымен екі жақты меморандум түзілген болатын. Осы меморандум аясында базар аумағындағы бос сауда орындары ұсынылып, қазіргі таңда 35 саудагер «Қырғы базарға», сегіз саудагер «Автонұр» базарына орналастырылды», - деді аудан әкімі Ғабит Мәуленқұлов. Айта кету керек, жаңа орындарды аталған сатушылар үш ай бойы тегін пайдаланады. Бұған қоса бұл азаматтарды әлеуметтік қамсыздандыру және жұмысқа орналастыру мәселесі бойынша жұмыс тобы құрылады. Еске сала кетсек «Қырғы базар» маңында жабайы сауда қатарлары көбейіп болатын. Олар заңсыз орналасқан және қаланың сәні мен тәртібін бұзып тұрған еді. Қазір базар адамдардың жүріп-тұруына ыңғайлана түскен.