Шымкентте ел игілігіне беріліп жатқан нысандар көбеюде. Өткен аптада қала тұрғындары және қонақтары үшін ерекше демалыс орны ашылды. «Fontan» деп аталатын аквапарк жаз маусымына таптырмас демалыс аймағы. Салтанатты жиынға арнайы қатысқан шаһар басшысы қалада халықтың тынығып, демалуына арналған орындар көбейіп келе жатқанын, соның бірі Қошқар ата өзені екенін тілге тиек етті. Аквапарк 2 гектар аумақты алып жатыр. Онда биіктен сырғанайтын 8 төбешік орналасқан. Оның екеуі биіктігі 22 метрді құрайтын еліміздегі ең биік төбешік болса, ТМД елдері арасында ең ұзын төбешік те осында бой көтерген. Айта кетейік, «FONTAN» аквапаркі Орта Азиядағы ересектер мен балаларға арналған ең үлкен су қалашығы. Мұнда жасанды толқын және бассейін суын жылытуға арналған құрылғылар орнатылған. Кәсіпкердің айтуынша, демалыс аймағында 200-ге жуық адам жұмыспен қамтылған. Тәулігіне 2 мыңнан астам келушіге қызмет көрсетуге қауқарлы. Іс-шара барысында балаларға арналған ойын-сауық бағдарлама мен ұтыс ойындары ұйымдастырылды. Кеш соңы Қазақстанның эстрада жұлдыздарының қатысуымен концерттік бағдарламаға ұласты.