Шымкент қаласының қауіпсіздігі басты назарда. Тұрғындардың қауіпсіздігін сақтау мақсатында шаһарда «Шымкент – қауіпсіз қала» бағдарламасы әзірленген болатын. Осы аптада қала әкімдігінде мегаполистегі құқық бұзушылықтардың алдын алу және қоғамдық қауіпсіздікті қамтамасыз ету мақсатында жиын өтті. Шымкент әкімінің орынбасары Қайрат Нұртайдың төрағалығымен өткен жиын барысында «Шымкент – қауіпсіз қала» бағдарламасы аясында құрылған жұмысшы топтың есебі тыңдалды. Бағдарламаға сәйкес қала аумағында өзге діни ағым өкілдерімен тұрақты түрде жұмыс жүргізіліп, 45 азаматтың дәстүрлі дінге бет бұру нышаны анықталған. Сондай-ақ, 47 қоғамдық тамақтану орнына тексеру жұмыстары жүргізіліп, құқық бұзушылықтың алдын алу үшін білім мекемелерінде бейнебақылау камералары орнатылған. Сонымен қатар «Түнгі қаладағы балалар», «Жасөспірім» рейдтік іс-шаралары өткізілген. Соның нәтижесінде қала аумағындағы құқық бұзушылық саны өткен жылмен салыстырғанда он екі пайызға төмендеді дейді жауаптылар. Жалпы бағдарламаның қала өмірі, қауіпсіздігі үшін әсері мол дейді мамандар. Аталған іс-шаралар алдағы уақытта да жалғасын таба бермек.