Бүгін еліміздің үшінші мегаполисінде ішкі істер органдарының ашықтығын қамтамасыз ету және халыққа қызмет көрсету сервисін заманауи талаптарға сай жүзеге асыру мақсатында Еңбекші ауданы Полиция басқармасының ғимаратында Шымкент қаласы Полиция департаментінің екінші фронт-офисі ресми ашылды. Ашылу рәсіміне Шымкент қаласы әкімінің бірінші орынбасары Нұртай Қайрат және Полиция департаментінің бастығы Ералы Жумаханбетов қатысты.
Мұнда келген халық өзіне қажетті кеңесін алып, өтініштері мен басқа да құжаттарын қысқа мерзімде қабылдануына мүмкіндік алады. Қала тұрғындары ішкі істер органдарына қатысты сұрақтарына жауап алып, қабылданған арыз-шағымдардың қаралуын қадағалай алады.
Фронт-офиске келген азаматтарға ыңғайлы болу үшін күту залы, ресепшн, кеңес беретін азаматтардың жұмыс орнында қызметкерлерге қажетті компьютерлік құрал-жабдықтар мен базалар орнатылған. Арыздардың басым бөлігі лицензиялау-рұқсат беру жүйесі, әкімшілік тәжірибе, қылмыстық істерді тергеу мәселелеріне қатысты болғандықтан, фронт-офис алаңында осы мәселелерге қатысты құзыретті қызметкерлер, яғни жергілікті полиция қызметі, әкімшілік тәжірибе инспекторлары, анықтаушылар мен тергеушілер қызмет көрсетеді.