Қазіргі таңда билік өкілдері халық үніне құлақ асып келеді. Бұл әсіресе басшылардың, әкімдердің қарапайым тұрғындармен арада алтын көпір орнатуы – көптеген күрмеуі шешілмеген мәселенің түйінін тарқатуға себеп болуда.
Шымкент қаласының әкімі Мұрат Әйтенов те тұрғындармен жиі жүздесуді, тікелей байланысуды әдетке айналдырған. Қала басшысы жақында ғана «Instagram» желісінде дәстүрлі тікелей эфирде тұрғындармен жүздесті. Қала әкімі бұл жолы көшені жарықтандыру мәселелерін талқылады. Қала тұрғындары осы күнге дейін көшені жарықтандыру жөнінде жиі шағымданып келген болатын. Қала әкімі көше шамдарын орнату және жарықтандыру жүйелерінің құрылысы туралы баяндап, тұрғындардың сауалдарына жауап берді.
Мұрат Дүйсенбекұлы алдымен эпидемиологиялық жағдайдан хабардар етті. Өткен тәулікте COVID-19 инфекциясын жұқтырған 9 жағдай тіркелді. Бүгінгі күні қалада 1 060 төсек - орын бар (жұқпалы - 560, карантин - 500), оның 883 төсек – орны бос. Жұқпалы және карантиндік ауруханаларда 177 науқас ем қабылдауда немесе толымдылығы 17%.
Жалпы Шымкентте орталық маңызға ие 747 көше бар. Өткен жылы 39 көшеге жарық жүйесі орнатылса, 4 көшеде қайта құру жұмысы жүргізілді. Нәтижесінде көшені жарықпен қамту 25 пайыздан 31 пайыздан асты. Ленгір тас жолы бойындағы ескі шамдарды диодты шамға ауыстырылды. Қосымша жарық жүйесін орнатуға 161,2 млн теңге қаржы қаралып тиісті жұмыс атқарылды.
–Қазіргі таңда, шаһардағы 228 көше мен 8 саябақ, 32 гүлзар және 1026 көпқабатты тұрғын үй ауласында 43 016 дана түнгі жарық шамы жарқырап тұр. 2021-2023 жылдары көшені жарықтандыру мен оны күтіп ұстау бойынша мемлекеттік-жекеменшік әріптестік аясында 16,4 млрд теңгеге бірқатар жобалар жүзеге асырылады, - деді қала әкімі.
Жоба аясында 312 көше жарықтандырылып (Абай ауданы: 83 көше, Әл-Фараби ауданы: 42 көше, Еңбекші ауданы: 89 көше, Қаратау ауданы: 98 көше), энергия үнемдейтін LED шамдар орнатылады. Нәтижесінде қамту көрсеткіші 70 пайызға жетпек.
Эфир барысында Мұрат Әйтенов, Шымкентті тұрғындар үшін қолайлы қалаға айландыру жолында көше жарықтандыру жұмыстарының маңыздылығына тоқтала келе, жобаның сапалы түрде жүзеге асырылуының басты назарда болатынын атап өтті.