Шымкенттегі мамандандырылған №2 халыққа қызмет көрсету орталығы жаңа ғимартқа көшті. Жаңа ғимарат алдыңғысына қарағанда кең әрі азаматтарға сапалы қызмет көрсету үшін барлық жағдай қарастырылған. «Азаматтарға арналған үкімет» КЕ АҚ Шымкент қаласы бойынша филиалының директоры Данабек Исабековтың айтуынша, автоХҚО-ға келетін азаматтар жүктемесінің және ағымының көбеюіне байланысты жаңа ғимаратқа көшу қажеттілігі туындаған.
– Біз мемлекеттік қызметтердің көрсетілу реті бойынша тұрақты талдау жасап, азаматтардың ыңғайлылығы үшін ХҚО аумағын кеңейту қажет деген қорытындыға келдік. Жаңа мамандандырылған ХҚО-да 48 инспектор жұмыс істейді, ал дайын құжаттарды қабылдау және беру үшін 27 жұмыс орны бар. 1500 ш.м. аймақта орналасқан автоХҚО-да, сондай-ақ, 300 көлікке арналған автотұрақ қарастырылған. Мүмкіндігі шектеулі жандар үшін пандус және шақыру батырмасы жұмыс істейді, - деді Д.Исабеков.
Мамандандырылған халыққа қызмет көрсету орталығы ғимаратында автокөлік құралының тіркеуін және қайта тіркеуін жүргізуге және жүргізуші куәлігін ауыстыруға болады.
Естеріңізге сала кетейік, Шымкентте қазіргі уақытта үш мамандандырылған халыққа қызмет көрсету орталықтары жұмыс істейді. Биылғы екі айда онда 14 089 жүргізуші куәлігі беріліп, 67 489 автокөлік қайта тіркелген. Тынысы кеңейген су жаңа ғимарат ташкент айналма жолында орналасқан. Енді мамандар азаматтарға кезек күтпей, уақытылы, қолжетімді қызмет көрсете салады.