Қытайдан бастау алған вирустың әлемге таралуы адамзатты тазалық пен денсаулықтың қаншалықты қымбет екенін ұқтырғандай. Індеттің кесірінен көптеген елдер төтенше жағдай жариялауға мәжбүр болды. Үшінші мегаполисте кеселді жұқтырғандар жоқ. Десе де сақтық та қорлық жоқ. Вирустан сақтану және тұрғындардың денсаулығын сақтау мақсатында қала әкімдігі қоғамдық көліктерге дезинфекциялау шараларын жүргізуді қолға алды.
Бұл туралы Шымкент қаласы жолаушылар көлігі және автомобиль жолдары басқармасы қоғамдық көлік бөлімінің басшысы Наурыз Сүгірәлиев мәлімдеді.
Қазіргі таңда Шымкент қаласында коронавирус инфекциясының алдын алу шаралары жүргізілуде. Жалпы, осы бағытта атқарылып жатқан жұмыстар қала әкімдігінің тікелей бақылауында.
— Шымкенттегі қоғамдық көліктер мен қалааралық бағытта қатынатын автобустарға санитарлық алдын алу шаралары жүргізілуде. Қаладағы барлық жолаушылар көлігіне әр айналым сайын дезинфекция жасалуда. Сонымен қатар, «Самал», «Бекжан», «Айна» автовокзалдарындағы басқа қалаларға барып-келіп жатқан автобустарға да профилактикалық шаралар тұрақты түрде күн сайын жалғасуда, — деді Н.Сүгірәлиев.
Еске салсақ, бүгінде Қазақстанда сационарлық карантинде 1 090, үй карантинінде 452 адам жатыр. Бұған қоса, Қытай мен көршілес мемлекеттерден келген азаматтар мониторингілеуден өтуде.