Шымкент еліміздегі ірі үш мегаполистің бірі. Сондықтан қалаға кіру-шығу жолдары үздіксіз қозғалыс үстінде. Мәдени астанаға келетін жолаушылар мен қонақтарға ыңғайсыздық тудырмас үшін жол қозғалысын реттеу аса маңызды. Себебі қаланың келбеті қақпадан басталады.
Осы орайда енді Шымкенттен шыға берісте кептеліс болмайды. Өйткені Бекжан базарының тұсындағы қосымша жол айрығы ашылды. Енді қаладан шыққан көліктер Алматы бағытындағы айналма жолға сол арқылы шығып кетеді
Ал, Темірлан тас жолы мен Ташкент бағытындағы айналма жол үстіне қойылған бағдаршам алынып тасталды. Яғни қаладан шыққан көліктер тура бағытта тоқтаусыз өтеді. Жалпы айналма жолға салынған көпір қаладан шыққан көліктердің нөпірін сейілту үшін тұрғызылған. Құрылыс жұмыстарының өтпелі болуына байланысты уақытша қиындықтар туындаған еді. Енді бұл мәселе шешілді дейді құрылысқа жауаптылар
«Қала әкімінің тапсырмасы негізінде Темірлан тас жолы бойындағы көше қиылыстарында көлік тығындарын болдырмау мақсатында оң жақ өткелдерді ашып жатырмыз. Қазіргі таңда төрт оң жақ өткелде қайта құру жұмыстары жүргізіліп, көлік қозғалысы ұйымдастырылатын болады»,- дейді Шымкент қалалық жолаушылар көлігі және автомобиль жолдары басқармасы басшысының орынбасары.