Жұқпалы індеттің жайылуына байланысты үшінші мегаполисте сақтық шаралары күшейтіліп, қала шекараларына 17 блок-бекеттері қойылғаны белгілі. Бекеттерде полиция және медицина қызметкерлері отбасын тастап күндіз-түні кезекшілікке тұрып, ел саулығын және тәртіпті бақылауда ұстауда. Осы орайда аталған мамандық иелерінің өз кәсібініе адалдығын және үлкен жүкті арқалап жүргендігін айта кету керек. Мұны шымкенттік еріктілер де сезінеді.
Қаладағы волонтерлар аталған мамандарға көмек және алғыс ретінде Бадам блок-бекетінде тұрған полиция және медицина қызметкерлеріне түскі ас таратты.
Игі шараға қалалық Жастар ресурстық орталығының мамандары атсалысып, “Hadya” мейрамханасы демеушілік етті.
Сын сағатта халыққа қалтықсыз қызмет етіп жүрген сала мамандарына алғысын білдірген "Hadya” кафесінің ресми өкілі Жүсіп Әбдірахманов барлық тамақтану орындарын осындай акцияға атсалысуға, бір-бірімізге қол ұшын созуға шақырды.
Айта кетейік, қалада індет жұқтырған 3 адам тіркелген. Ал сыртқы жолдарға орнатылған 17 санитарлық блок-бекетте полиция және медицина қызметкерлері тәуліктік режимде жұмыс істеуде.