Үшінші мегаполистің әр аудан басшылығы коронавирус инфекциясының таралу жолдарын тежеу мақсатында ірі сауда орындарын дезинфекциялау жұмыстарын қарқынды түрде жүргізуде. Себебі карантин құшағынан енді шыққан тұрғындар базар, сада орындарына көптеп баруда. Ал қаладағы эпидемиологиялық жағдай әлі тұрақталған жоқ. Сол себептен вируспен күрес те жалғасып келеді.
Бүгін бұл жұмыстардың жалғасы ретінде Еңбекші ауданында орналасқан «Айна» базары залалсыздандырылды. Осы ретте сатушыларға санитарлық нормаларды қатаң сақтау керек екені түсіндірілді. Бір реттік қолғап, бетперде киіп жүрулері міндетті және антисептикпен қолдарын сүртіп отырулары керек. Сондай-ақ сауда жасаушылар да ара-қашықтықты сақтауы тиіс.
Айта кетейік, аталған санитарлық жұмыстар Шымкент қаласы бас санитарлық дәрігерінің 2020 жылғы 17 мамырдағы №17 қаулысына сәйкес жүргізілді.
Еске сала кетсек, бұған дейін әкімдік мамандары Еңбекші ауданы аумағында орналасқан «Айна», «Евразия», «Көктем» базарлары мен «Фиркан», «Грамад», «Магнум» және тағы басқа ірі сауда орындарында карантин режимін сақтау жөнінде түсіндіру жұмыстары жүргізген болатын.