Жыл сайын шомылу маусымы кезінде қаншама адам суға кетіп, қайғылы жағдай орын алып жатады. Осындай оқиғалардың алдын алу мақсатында, Қаратау ауданы әкімдігі мен аудандық төтенше жағдай бөлімі және жергілікті полиция өкілдері бірлесіп шомылу маусымындағы қауіпсіздікті сақтау шаралары бойынша түсіндірме жұмыстарын жүргізді.
Олар Қайнарбұлақ тұрғын алабындағы көл маңында орналасқан тұрғын үйлерге арнайы түсіндірме жұмыстарын жүргізіп, үгіт-насихат қағаздарын таратты.
Айта кетейік, тек рұқсат етілген аймақтарға ғана шомылу керек. Әсіресе, жас балалар ата-ана қадағалауынсыз ағын суға шомылуға болмайды. Мамандар маусым кезінде ата-аналарды сақ болуға шақырады.
Әрбір адам шомылуға, баратын су айдынының қауіпті орындары мен ерекшеліктерін білуге тиісті, себебі жабдықталмаған жерлерде иірім, су басқан бөрене, тілімдер, темір, шыны және басқа да заттар болуы мүмкін. Өтіп бара жатқан моторлы қайықтарға жақын жүзу өте қауіпті, өйткені жүзу құралдары су түбіне қарай жүзіп келе жатқан адамды тартып кетуі мүмкін.
Бірқатар аурулар кезінде шомылуға тыйым салынады.Мысалы, жүрек ауруы бар, талып қалу, құлап қалуға бейім адамдарға шомылуға болмайды, сондай-ақ құлақтың дабыл жарғағының жарақаты бар адамдарға да.