Шымкент қаласында коронавирустық инфекциямен күресте ерекше көзге түскен 10 адам «Халық алғысы» медаліне лайық деп танылды. Ондықтың қатарында полицейлер мен дәрігерлер, кәсіпкерлер мен еріктілер бар. Олар пандемия кезінде тұрғындарға қолдан келер көмегін аямай, көзге көрінбейтін жаумен арпалысты.
Оларды бүгін Шымкент қаласы әкімдігінде өткен "BIZ BIRGEMIZ" онлайн-форумы аясында қала басшысы Мұрат Әйтенов марапаттады.
Онлайн-форум барысында қатысушылар Президенттің бейнеүндеуін тыңдады. Одан кейін еліміздегі пандемиямен күрес тарихы туралы қысқаша бейнебаян көрсетілді. Сонымен қатар жиында қоғамның белсенділері сөз алып, өз алғыстарын да жеткізді.
«Халық алғысы» медалін алғандардың қатарында жедел медициналық жәрдем станциясының дәрігері Әлімбаева Эльмира, Жұқпалы аурулар ауруханасының бас медбикесі Байсақалова Әлия, «Мейірім» оңалту орталығының дәрігері Ағабекова Гүлжан, Полиция департаментінің командирі Бұхарбаев Мұхтар, полиция инспекторы Ходжанов Руслан, №35748 әскери бөлімінің қызметкер Бабаханов Мадияр, Әлеуметтік бейімдеу орталығының қызметкері Ахметова Мейзкүл, «GraMad Retail» ЖШС-ның бас директоры Наимбекова Айжан, «Оңтүстік» телеканалының бас редакторы Қуанышбаева Гүлсара, ерікті Ким Евгения бар.