Шымкент қалалық мәслихаттың кезекті 62-ші сессиясында депутаттар үш жылға бюджетті бекітті. Оның көлемі 356 миллиард теңгені құрады. Қаржының басым бөлігі әлеуметтік, білім, мәдениет салалары мен коммуналдық мәселелерді шешуге бағытталды.
Сессияның қарауына ұсынылған 22 мәселе алдын тұрақты комиссияларда жан — жақты талқыланғандықтан, олар бойынша шешім бірауыздан қабылданды. Үш жылға арналған қала бюджетіне өзгерістер мен толықтырулар енгізілді.
«Медицина саласына 22,7 миллиард теңгеге 16 жоба іске асырылды. 500 орындық емхана бір аптада пайдалануға беріледі»,- деді сессияда Шымкент қаласы әкімінің орынбасары Ербол Садыр.
Жеті миллиард теңгеге қаладағы төрт аудандағы 260 көпқабатты үйлердің ауласын абаттандыруға 15 жоба жүзеге асырылуда. Еңбекші ауданында бұл жұмыстар аяқталса, қалған аудандарда жалғасып жатыр.
Білім саласында жеті жобаны жүзеге асыруға 10 миллиард теңге бағытталды. Әкімшілік іскерлік орталығында 320 орындық балабақшаның құрылысы аяқталып, 150 орындық өнер мектебі пайдалануға тапсырылмақ.
Қаланың іргесіндегі «Азат» шағынауданын газдандыруға 33,7 миллион теңге, «Тұран» шағынауданындағы 1,3,7 көше жолдарының құрылысына 400 миллион теңге бөлінбек. Бәйдібек би мен Ұ. Арғынбеков көшелерінің қиылысындағы жол айырығының құрылысына 50 миллион теңге бағытталды.