Төртінші сәуірден бастап Шымкент қаласы карантинге жабылғаны мәлім. Сақтық шарасы ретінде шаһарда бірқатар шектеулер енгізілген болатын. Төтенше жағдай кезінде қалада азық-түлік базарлары мен дүкендер жұмысын жалғастыруда. Басшылардың айтуынша азық-түлік қоры жеткілікті.
Осы орайда «Nur Otan» партиясы Әл-Фараби аудандық филиалының партиялық бақылау комиссиясы коронавирусқа қарсы күресті күшейту үшін енгізілген шектеу шараларының сақталуын бақылау жүргізу мақсатында Шымкенттегі бірқатар блок-бекеттер мен базарларда бақылау жұмыстарын жүргізді.
Партиялықтар қаладағы Қапал батыр көшесінде орналасқан блок-бекетте көлік жүргізушілерінің қаншалықты карантин талаптарын орындап жатқанын бақылап көрді. Карантин талаптары орындамаған көп жүргізушілер кері үйіне қайтарылды.
Сонымен қатар халық жиі тұтынатын тауарлардың бағасының тұрақтылығына талдау жүргізілді. Партиялықтар баға өсімі жоқ дейді. Сондай-ақ барлық дүкендер мен сауда орындары тұрғындарды бетпердемен және дене қызуын өлшеп кіргізуде. Барлық санитарлық талаптар сақталуда.
Шымкент қаласы бас санитарлық дәрігердің бұйрығына сәйкес, барлық базарлар мен азық-түлік дүкендері 10.00-21.00 аралығында жұмыс істеу керек екендігін ескертті.