Қазіргі кезде карантин режиміне қарамастан үшінші мегаполситің құрылысы қыза түсуде. Шаһардағы құрылыс жұмыстары қарқын алып, қаланың көп бөлігінің жолдары күрделі жөндеуден өтіп, ғимараттар мен нысандар салынып жатыр. Солардың бірі 10 нысан – 13 шақырым жол, 3 көпір, 1 оң жақ өткел қайта құрылымдаудан өтуде.
Құрылыс жобаларының қатарында А-2 автожолы мен Темірлан тасжолының қиылысындағы көлік өткелдері, А-2 автокөлік жолының бұрынғы қоқыс полигонынан Ынтымақ шағынауданына дейінгі бөлігін жөндеу, Жібек жолы, Төреқұлов, Адырбеков, Бадам өзеніндегі автокөлік көпірлері мен Сайрам су өзеніндегі Леңгір бағытындағы көпірді қайта құрылымдау жұмыстары бар. Бұған қоса 50 шақырым жол мен 2 көпір толық жөнделіп, 308 шақырым жол орташа жөндеуден өтпек.
Негізінен алдын-ала қойылған жылдық жоспар бойынша 223 нысан пайдалануға берілсе, 2 нысан 2021 жылға өтпелі. Ал осы жылдың мамыр айының соңына дейін 136 нысан, маусым мен тамыз айларында 75 нысан ашылады деп күтілуде. Осы орайда ерекше тоқталып өтсек, қаладағы ең маңызды құрылыс жүріп жатқан көшелердің бірі – Республика даңғылы мен Рысқұлов көшесі. Мұндағы Республика даңғылының жалпы ұзындығы – 5,3 шақырым, ені 2х14м болса, нысанның жалпы сомасы 2 394,0 млн.теңгені құрайды. Ал Т.Рысқұлов көшесінің жалпы ұзындығы – 4,2 шақырым, ені – 2х7м. Бұл құрылыс жұмыстары А.Байтұрсынов пен Әл-Фараби көшесі аралығында жүргізілмек.
Сонымен қатар қаладағы тағы бір маңызды жол жөндеу жұмыстарының бірі – А-2 «Хоргос-Алматы-Шымкент-Өзбекстан Республикасының шекарасы» автомобиль жолы Бадам өзені үстінен өтетін көпірді қайта құру учаскесінің ІІІ кезең жұмыстары. Аталған көпірдің ұзындығы – 144 м., ені – 28,2 м. Бұл жоба 2020 жылы толық аяқталып, қала тұрғындарының игілігіне берілмек.