Ақ алтынды аймақ Мақтаарал ауданының қауындарына сұраныс күшейіп келеді. Бұған дәлел маусым кезінде күн сайын 200-300-ге тарта қауын-қарбыз тиелген жүк көліктері ТМД елдеріне, Прибалтика елдеріне, Түркия, Германия, Греция мемлекеттеріне жол тартады.
Жергілікті өнімге қызығушылық танытқан ресейлік және еуропалық кәсіпкерлер Мақтаралдың қауыны әлемдегі ең тәтті қауын деген жоғары бағаларын берген болатын.
Салаға жауапты мамандардың дерегінше былтыр мақталы өлкеде 316 366,5 тонна бақша өнімдері өндірілген. Ал, биыл диқандар 11502 гектарға бақша дақылдарын екті. Мұның ішінде 10 мың гектары қауын, 1500 гектардан астамы қарбыз дақылы. Қазірдің өзінде диқандардың еңбегі бағаланып, 35 мың тоннаға жуық бақша өнімдері Қазақстанның барлық аймағына таралып, Ресейге және Еуропаның бірнеше елдеріне экспортталып үлгерді.
Айта кетейік,Түркістан облысы Мақтаарал ауданының диқандары Республикада ең бірінші болып және Өзбекстанға қарағанда 1 апта бұрын бақша өнімдерін нарыққа шығарады.
