Қазығұрт аудандық ауыл шаруашылығы бөлімінің егін шаруашылығы жөніндегі бас маманы Марат Жолдасовтың мәліметінше биыл аудан жоспарлаған 84 мың гектар егістік алқапты игеру 101 пайызға орындалған. «Бұл тек арпа, бидайдың ғана көрсеткіші емес, оның ішінде жүгері, мақсары, күнбағыс, сүрлемдік жүгері, картоп, бақша өнімдері, жоңышқа да бар. Атап айтқанда, күздік және жаздық бидай көлемі 35 900 гектарды құрады. Соның бүгінгі таңда 19 247 гектары орылды. Әр гектардан 24,5 центнерден түсіп, қамбаға 47 189 тонна бидай жиналды. Ал, арпа 4500 гектарға егілген. Қазіргі уақытта 3929,3 гектары орылып, әр гектар түсімділігі 24,3 центнерден айналуда. Жалпы алғанда ауданда 56 537 тонна астық жиналды, – деді М.Жолдасов.
Егін орағы науқанына биыл аудан бойынша 218 комбайн, соның ішінде 27 жаңа комбайн қатысуда. Ал, тасымалдауға 144 автокөлік, 102 трактор тартылған. Қазіргідей 45 градусқа дейінгі ыстықта өрт қауіпсіздігі де ескеріліп, әр ауыл округінде өртке қарсы штаб құрылған. Онда К-700 тракторлары, су тасымалдаушы цистерналар сақадай сай тұр.