Қазақстан Республикасының Ұлттық академиялық кітапханасының басшысы, п.ғ.д., профессор Үмітхан Дәуренбекқызы Мұңалбаева мен Пайдаланушыларға қызмет көрсету және идеология бойынша бірінші орынбасар Алия Мамбайқызы Кожабекова «Отырар» қалалық ғылыми-әмбебап кітапханасына арнайы қызметтік іссапармен келді.
Республикамыздың бас ғылыми-әдістемелік орталығы болып табылатын Ұлттық академиялық кітапханасының басшылары жаңа мегаполистің ірі мәдени, рухани ошағы - «Отырар» қалалық ғылыми-әмбебап кітапханасының жай-күйімен, тыныс-тіршілігімен танысып, кітапхана қызметкерлерімен еркін форматта басқосу өткізіп, ашық әңгіме өрбіді.
Іскер, білікті, тәжірибелі кәсіпқой мамандар ретінде Үмітхан Дәуренбекқызы мен Алия Мамбайқызы «Отырар» қалалық ғылыми-әмбебап кітапханасы қызметкерлерінің барлық кәсіби тұрғыдағы сұрақтарына жауап беріп, заманауи кітапханалық, ақпараттық қызмет бойынша әдістемелік көмек көрсетіп, өз іс-тәжірибелерімен бөлісті. Кітапхана директоры, ф.ғ.к., ақын Анар Абусайылқызы Жаппарқұлова Нұр-Сұлтан қаласынан арнайы келген әріптестерімізге өз алғысын жеткізді. Өз кезегінде қонақтар жаңа басшыға ғалым ретінде кітапхананың өркендету жолында сәттілік тілеп, қолдау көрсетті. Сондай-ақ, Ұлттық академиялық кітапханасының басшылары аймақтағы кітапхана басшыларымен де кездесіп, кітапхана саласының дамуы туралы әңгімелесті.